Breve biografía

No 2023 Jose Carballido forma a banda que, nese mesmo ano, publica o seu primeiro álbum “I”. Ao longo de 2024 e 2025, continúa con varios sinxelos nos que se acentúa a influencia tradicional e se incorporan pinceladas electrónicas que dan novos matices ao son da banda, que conviven co rock que sempre estivo presente na súa música, combinando momentos intensos e contundentes con outros máis tenros e íntimos, sen deixar de lado a troula e o baile. Estas pezas acaban conformando o EP Lembranzas Futuras, que se publica en Xuño de 2026.

Carballido amosa no seu proxecto a continua transformación que experimenta como músico e compositor, partindo das súas raíces galegas, da súa formación clásica e das influencias do rock, sen perder de vista as vangardas. A Sombra dos Soños é unha proposta que une memoria e innovación, tradición e modernidade, na procura dunha obra atemporal nun universo propio e inexplorado.